Inlawlawag ti Duterte Youth party-list a ti panagaramat ti dadduma nga apilyedo ti umuna a nominee daytoy a ni Drixie Mae Suarez-Cardema ket para iti “name recall” wenno nalaka a mailasin ti nagan iti politika.
Sigun kenni Ronald Cardema, chairman ti Duterte Youth ken asawa ti sigud a representative a ni Ducielle Marie Suarez-Cardema, kadawyan a dagiti mammanday-linteg ti agar-aramat ti “political name” tunggal panangrugi ti Kongreso.
Maipalagip a nababalaw iti social media ti nasao a partylist kalpasan a nadlaw nga agsabali ti apelyido ni Drixie iti Certificate of Nomination (CONA) daytoy, nu sadinno mapapati nga inaramtna ti apilyedo a “Cardema” imbes a ti pudnona nga apilyedo a “Suarez.”
Sigun met kenni Commission on Election (Comelec) Chairman George Garcia, mangipaulog ti Law Department daytoy iti show cause order tapno maimbestigaran ti panangusar ti sabali nga apilyedo, ngem inlawlawagna a saan a kayat a sawen daytoy nga adda kaso ti disqualification wenno election offense.
Innayon pay ni Garcia nga adalen ti Comelec dagiti dokumento nga insubmitir ni Drixie para iti 2025 midterm elections, kasta metten dagiti sigud a rekordna.
Maipalagip a maikadua ti Duterte Youth iti party-list race iti National and Local Elections kalpasan a nakaala ti 2.3 milion a botos.
Nupay kasta, intantan ti Comelec ti pormal a pannakaiproklamar daytoy iti pending a kaso ti nasao a partylist.
