BAGUIO CITY – Dumanon iti siyam a dadakkel nga establishimento iti Central Business District ti partially a nangisurrender iti permits wenno lisensyada iti Cigarrete Beer Liquor (CBL) kalpasan a dagitoy ket naglabsing iti Smoke free baguio ordinace.
Iti panakiuman ti Bombo Radyo kenni Joshua Daniel Rivera, Communications Development Officer ti smoke free task force, kinunana a dagitoy nga establishemento ket saan kuma a maipaayan ti Cigarrete Beer Liquor permit.
Inlawlawag ti Rivera a mabalin met dagitoy nga agilako iti beer ken liquor ngem maiparit nga aglilakoda iti sigarilyo gapu ta dagiti establishimento ket nakapatakder 100 meters kadagiti prohibited area kas kadagiti pagadalan.
Iti sabali a bangir, impeksa ni Rivera a gapu iti agtultuloy a panagregget ti smoke free task force ket bimaba ti bilang dagiti agilaklako ti sigarilyo iti syudad nangrugi idi napainget ti implementasyon ti smoke free Baguio ordinance.
Idi napalabas a tawen, dumanon iti agarup 1,493 nga establishemento, groceries ken stores nga agilaklako ti sigarilyo ti naipaayan ti permit
Ngem ita a tawen ket dumanon laengen iti agarup 888 nga establishemento ti naipaayan ti permit.
Agbalballaag met ni Rivera a mas nasaysayaat a sumurot dagiti business establishments kadagiti paganurutan iti Smoke free ordinance tapno saan dagitoy a maipaayan iti pannusa.//Bombo Noveh Organo
