Matuloy inton bigat, June 19 ti panaka-tow dagiti lugan ken panakademolish ti building iti paset iti Barangay Beckel, La Trinidad, Benguet.
Iti kaudian a panakiuman iti Bombo Radyo kenni La Trinidad Mayor Romeo Salda maibasar iti panangberipikarna iti Municipal Legal Office, imblinglayna a saan a maitantan ti nasao a tignay iti baet nga adda iti tax declaration ti nangipasdek iti building ken nangiparada kadagiti luganda iti nasao a disso.
Maipalagip nga idi nangipaay ti lokal a gobyerno iti La Trinidad iti notice of demolition kadagiti maseknan nga indibidual, nangisumitir met dagitoy kadagiti tax declarationda.
Kasaruno dayta, nangipatungpal met ti Municipal Engineering Office iti plotting tapno mapaneknekan dagiti imprisinta a tax declaration dagiti maseknan nga indibidwal.
Nupay kasta, immunan nga indeklara iti Department of Public Works and Highways a ti nasao a kalsada ket paset iti Road Right of Way ken nangbukel metlaeng dagitoy iti Anti-Squatting Task Force.
Mainaig iti dayta, immunan nga immapela dagiti dagiti sumagmamano a motorista a dumaldalyasat sadiay Barangay Beckel, La Trinidad gapu kadagiti lugan a nakaparada iti igid ti kalsada a posible a makaitunda iti aksidente.
Sigun met iti partikular a social media post, agparparang a nagbalinen a private parking area ken junkshop ti nasao a disso a sigud a layby ken viewdeck iti nasao a barangay.//Bombo Genzel Depayso
