Umap-apela ti sumagmamano a residente iti Tuding,Itogon,Benguet tapno maisardeng ti panakaibelleng dagiti nagduduma a waste products a mangituntunda iti polusyon iti karayan iti nasao a barangay.
Iti panakiuman iti Bombo Radyo iti maysa a concerned citizen, agarup uppat a tawenen a parikut dagiti residente ti panakapollute iti pagtataudan iti danum dagitoy.
Sigun iti concerned citizen, naiyuman dan ti nasao a parikut kadagiti nagduduma nga opisina.
Immuna a naipakaammo daytoy kadagiti maseknan nga opisyales iti nadakamat a barangay ngem sigun kenkuana, awan ti nagbalin a tignayda para iti daytoy.
Kasaruno dayta, nagkiddawda iti tulong iti local chief executive iti Itogon nu sadino, naipanamnama a maimuntaran ti nasao a disso iti karatula a mangipakpakammo nga adda iti mabalin a maapektaran a kaarayan iti panagibelleng iti basura ngem agingga iti agdama ket awan pay ti naipaay nga update kadakuada.
Malaksid iti dayta, naipakammo metten ti nasao a pakaseknan iti munsipyo iti La Trinidad a maatap a pagtataudan dagiti pollutants.
Nupay kasta,kinuna ti nasao nga indibidwal a saan pay nga inaksyunan ti La Trinidad daytoy.
Mainaig iti dayta, personal metlaeng nga inyuman ti concerned citizen ti nasao a pakaseknan iti regional office ti Department of Environment and Natural Resources ngem kinuna dagitoy a pribado a lote ti nasao a dumping site.
Gapu iti naobserbaranda a kinaawan iti aksyon a maipapaay iti nasao a pakaseknan, inaklonna a naupay dagitoyen a mangnamnama a mapreserba pay ti karayan.
Innayonna a nabayagdan nga ilablaban ti pagsayaatan daytoy ngem awan iti maaramidanda nu dagiti namnamaenda a mangtulong kadakuada ket saan metlaeng nga agtignay.
Ngarod ket napanunutda a posible a makatulong ti social media para iti panakarisut ti nasao a pakaseknan kas iti naipablaak a road obstruction ken squatting issue idiay Barangay Beckel, La Trinidad, Benguet itay laeng nabiit.//Bombo Genzel Depayso
