BAUKO, MT PROVINCE – Natiliw dagiti dua nga indibidwal iti search warrant operation kalpasan a narekober kadakuada ti maatap a shabu ken dadduma pay a drug paraphernalia idiay Maba-ay, Bauko, Mt Province idi kalman, Hunyo 18.
Nakumpiskar manipud iti 28-anyos a lalaki, residente iti nasao metlaeng a lugar, ti innem a self-sealing plastic bags a naglaon iti maatap a shabu ken 13 heat-sealed transparent plastic sachet a naglaon iti maatap a shabu nga agdagsen iti 55 a gramo ken aggatad iti P374,000.
Nakumpiskar metlaeng manipud iti 33-anyos a lalaki, laborer ken residente iti nasao a barangay ti maysa a pakete ti maatap a shabu nga agdagsen iti lima a gramo ken aggatad iti P34,000, maysa nga improvised glass tooter a naglaon metlaeng iti maatap a shabu nga aggatad iti P93,942, maysa a caliber pistol ken dadduma pay a drug paraphernalia.
Sumango dagiti suspek iti kaso a panaglabsing iti RA 9165 wenno ti Comprehensive Dangerous Drugs Act of 2002 ken Section 28 ti Republic Act 10591 wenno ti Comprehensive Firearms and Ammunition Regulation Act.
