Inlawlawag ni Engineer Charles Carame, dadaulo iti City Disaster Risk Reduction and Management Office-Baguio nga awan iti mailaksid nu mapasamak ti gingined ti maaw-awagan a The Big One.
Sigun kenni Engr. Carame, ti dakkel a saludsod ket nu kaano ken sadino ti pakapasamakan daytoy rason a makidkiddaw ti panakipaset ti amin kadagiti maipatpatungpal nga earthquake drills.
Maysa kadagiti ak-aksyunan ita iti CDRRMO-Baguio ti panakikoordinar kadagiti amin a babbarangay iti City of Pines tapno guyuguyen dagiti tagibalay wenno households a makipaset kadagiti earthquake drill.
Sigun kenni Engr. Carame, nababa ti compliance dagiti household iti siudad nu maipapan iti panakipasetda iti earthquake drill rason a makikiddaw ti partisipasyon dagitoy.
Kabayatanna, balligi ti panakaipatungpal iti maikadua a kwarter iti nationwide simultaneous earthquake drill iti Baguio City idi kalman.
Daytoy ket naangay alas nueve iti agsapa a nakikaykaysaan ti kameng dagiti nagduduma nga opisina iti gobyerno, institusyon, ken pasilidad iti City of Pines.
