Inlawlawag ti Bureau of Fire Protection-Baguio ti nabayag ken nabuntog a panagresponde dagitoy iti napasamak nga uram sadiay Purok 5, Bakakeng Central, Baguio City idi kalman.
Iti pannakiuman ti Bombo Radyo kenni Fire Officer 2 Clint Dominick Labon- Investigator Bureau of Fire Protection-Baguio, kinunana a nabayagan dagitoy gapu ta nailaw-an dagitoy iti lugar a nagturonganda gaputa ti naipakaammo kadakuada a nakapasamakan ti uram ket sadiay Santo Rosario.
Gapu iti dayta, nagramaramen ti uram idi nakadanun dagitoy iti nakapasamakan ti nasao nga uram.
Sigun kenkuana, ti nauram nga area ket dumanon iti agarup 115 square meter no sadino dua a pagtaengan ti nauram.
Gapu iti dayta, dua a pamilya ti naapektaran iti daytoy rason a temporaryo paylaeng a nakipagnaed dagitoy iti pagtaengan dagiti kabagyanda sadiay Irisan, Baguio City.
Ti met biktima a nadangran ket maberberipikar paylaeng no adda daytoy iti ospital gapu ta first degree burn ti nasagrapna.
Nupay kasta, awan pay ti danyos ti nadadael gapu ta manarimaan paylaeng ti kanayunan nga imbestigasyon.
Kabayatanna, panggep ti pamilya a nairaman iti nasao nga uram nga agipila iti kaso kontra iti 65-anyos a lalaki a nagpuor iti basura iti uneg ti pagtaenganna a nangitunda iti nasao nga uram.//Bombo Noveh Organo
