BAGUIO CITY- Inyunay-unay ni Baguio City Councilor Vladimir Cayabas a saan laeng a dagiti estudyante ti agnumar iti naipasa nga ordinansa a Brgy. Pagbasa Program iti siudad ti Baguio.
Iti panakiuman ti Bombo Radyo kenni Baguio City Councilor Vladimir Cayabas, kinunana a nasayaat ti panakabukel ti Brgy. Pagbasa Program tapno addu nga ubbing ken agtutubo ti agnumar iti daytoy partikular dagiti out of school youth ken out of school children.
Babaen iti nasao nga ordinansa a na punduan iti P500, 000, nadutukan nga implimentar daytoy dagiti Local Government Unit ti Barangay iti siudad, kadwada ti Departament of Education.
Dagitoy ti mangiapointar kadagiti volunteer mentors a mangisuro kadagiti ubbing ken agtutubo nga agbasa.
Naibinglay metlaeng ni Councilor Cayabas a maipatpatungpal tunggal bakasyon wenno weekend ti nasao a programa.
Iti agdama, adda dagiti sumagmamano a barangay iti siudad ti Baguio a mangipatpatungpal iti daytoy babaen iti bukodda a pondo.//Bombo Genzel Depayso
