BAGUIO CITY – Dumanon iti 79 a personnel ti Baguio City Police Office dagiti obese bayat a dumanon iti 438 met dagiti overweight.
Gapu iti daytoy, tallo agingga lima a porsyento ti kasapulan a dumalan iti panag-ehersisyo.
Iti pannakiuman ti Bombo Radyo kenni PMaj Marcy Grace Marron, Public Information Officer ti Baguio City Police Office, kinunana a nu maipapan iti pakabuklan a bilang dagiti personnel ti Philippine National Police iti entero a pagilian, 60 dagiti lallaki nga obese bayat a 19 dagiti babbae.
Kabayatanna, 82 met a babbai dagiti overweight bayat a 56 met kadagiti lallaki.
Sigun pay kenni PMaj Marron, dagiti obese ken overweight ket dagiti patrolman, patrolwoman ken corporal.
Karaman kadagiti rason a dinakamat ni Marron nu apay nga dagiti obese ken overweight a pulis nangruna kadagiti babbai ket gapu ta naganak ken agpaspasoso dagitoy bayat a dagiti dadduma ket under maintenance.
Innayon ti nasao nga opisyal nga awan unay ti oras dagitoy nga ag-ehersisyo nangruna dagiti agduty iti 12 hours ken gapu iti kinaadu dagiti administrative work nga as-asikasuen dagitoy.
Iti baet daytoy, agtultuloy ti police technique wenno physical conditioning programa para kadagiti pulis tunggal Martes ken Huebes.
Inlawlawag pay ni PMaj Marron, a sakbay a makastrek dagiti pulis iti trabaho ket nasken a makapasa pay dagitoy iti Body Mass Index.
Inaklonna nga idi ket adu dagiti agreklamo gapu iti daytoy a requirements ngem kasapulan a makapasa iti Body Mass Index sakbay a maipromote.
Inyunay-unay ni Marron a pagsayaatan metlaeng dagiti pulis ti napintas a pammagi tapno makapagresponde dagitoy a dagus iti aniaman nga insidente.//Bombo Noveh Organo
