Nakumpiskar ti dried marijuana leaves nga agdagsen ti 21 kilograms ken agbalor ti P2,520,000.00, ken natiliw ti dua a drug personalities bayat ti buy-bust operation ti Philippine Drug Enforcement Agency-Cordillera Baguio/Benguet ken Mt. Province Provincial Office idiay Burnham-Legarda, Baguio City idi laeng kalman.
Natiliw dagiti suspek nga addaan iti 20 a pidaso ti dried marijuana bricks ken maysa nga elongated form kalpasan a nakitransaksionda iti undercover agent.
Binigbig ni Regional Director Derrick Arnold C. Carreon dagiti suspek a lallaki nga agtawen ti 43 manipod Bakun, Benguet, ken maysa pay nga agtawen ti 53 manipod Cabanatuan, Nueva Ecija.
Iti agdama, adda dagitoy iti kostodiya ti PDEA-Cordillera, ken mapilaan dagitoy iti reklamo gapu iti panaglabsingda ti Republic Act 9165 wenno ti Comprehensive Dangerous Drugs Act of 2002.//Bombo Benjo Guzman
