Dumanon iti 86.67 % ti suplay ti kuryente iti Baguio-Benguet.
Manipod iti nasao a porsiento, 97.38% iti siudad ti Baguio, 44.63% iti Atok; 45.63% ti Bakun, 97.65 iti Bokod, 96.17 iti Buguias; 47.96 ti Itogon; 35.89 ti Kabayan, 35.89 ti Kapangan, 75.01 ti Kibungan, La Trinidad ti 95.40, Mankayan ti 100, Sablan ti 57.74, Tuba ti 38.51, ken Tublay ti 96.03.
Iti interview ti Bombo Radyo kenni Laarni Ilagan, Community Relations Associate ti Benguet Electric Cooperative, kinunana a kagudua a feeders ti naisimpa manipod iti nagduduma a barangay iti siudad ken agtultuloy metten ti pannakaisimpa dagiti feeders idiay Benguet.
Ti kangrunaan a rason ti pannakapukaw ti kuryente ket gapu kadagiti kayo a natumba a nangdadael kadagiti poste, ken ti napigsa a panagbayakabak ti tudo a rason ti pannakatumba dagiti dadduma a poste.
Gapu iti dayta, pakabuklan iti P758,756.17 ti gatad ti pannakadadael dagiti primary holes ken lines.
Naipasidong ti red alert idi paylaeng Hulio disi siete iti agdama a tawen nu sadinno, na-activate ti kanayunan a manpower ti BENECO, ken naalerto dagiti linemen iti awag, ken pannakaipatungpal ti dagos a panagsukimat iti suplay ti kuryente.
Imbinglay ni Laarni a dumanon iti 125 a personnel ti nasao a kooperatiba ti naideploy pakairamanan dagiti support personnel ken contructors personnel.
Kabayatanna, nagdispensar ni Laarni iti publiko nangruna dagiti naawanan ti suplay ti kuryente.
Iti baet daytoy, dakkel ti panagyamanna kadagiti amin a mangbigbigbig ti panagregget nga ar-aramidenda ken ti suporta a maaw-awat dagitoy nangruna dagiti personnel iti grounds.
