Nakalukaten ti kaaduan a kalsada iti probinsia ti Benguet.
Daytoy ket gapu iti panagtinnulong dagiti kameng ti Provincial Disaster Risk Reduction and Management Office, Department of Public Works and Highways, sumagmamano a contractors ken dadduma pay, a madalusan ti dalan gapu iti epekto ti bagyo nga Emong a dimmalapos iti pagilian nangruna iti Luzon.
Iti pannakiuman ti Bombo Radyo kenni Roderick Awingan, Mayor ti La Trinidad, Benguet, kinunana a karaman kadagiti nakalukat a kalsada ket dagiti provincial ken national road.
Para met iti sitwasyon ti Longlong Road, kinuna ni Awingan nga aglukat ken agsara ti sitwasyon ti nasao a kalsada gapu iti mabambantayan a bantay, ken ti napasamak a panagregaay ti daga.
Gapu iti dayta, imbalakadna iti publiko nangruna dagiti motorista nga agannad nu lumabas iti kalsada.
Kabayatanna, awan metten ti evacuees nga agtaltalinaed kadagiti evacuation centers, ngem sigun kenni Awingan, adda dagiti dadduma nga agtaltalinaed kadagiti kabagyan wenno gagayyemda iti agdama.
