Ibilbilang dagiti sumagmamano a lider ti House of Representatives a karma ti pannakadadael ti Chinese vessel gapu iti insidente iti nagbaetan ti People’s Liberation Army (PLA) Navy ship ken Philippine Coast Guard (PCG) idiay Panatag (Scarborough) Shoal itay nabiit.
Sigun kenni Deputy Speakers Jefferson Khonghun, “What goes around comes around”.
Kabayatanna, kinuna met ni Deputy Speaker Paolo Ortega V a nabiktima dagiti Chinese gapu iti bukodda nga aramid.
Impettengna a rumbeng nga awan dagitoy sadiay Scarborough.
Maipalagip a nagbinnangga ti dua a People’s Liberation Army (PLA) Navy ship ti Chinese Coast Guard (CCG) bayat ti panang-harassda iti Philippine Coast Guard (PCG) BRP Suluan.
Sigun iti report, pinadas ti Chinese Coast Guard (CCG) nga agaramat ti water cannon iti BRP Suluan ngem naliklikan ti Philippine Coast Guard (PCG) a nangitunda iti panagbinnangga ti dua a barko ti China.
Napasamak ti insidente kabayatan ti panag-escort ti BRP Suluan ken BRP Teresa Magbanua iti M/V Pamamalakaya tapno tumulong iti agarup 35 a Filipino fishing vessels.
