Agsagsagana itan ti Philippine Army para iti panangipaayda iti suporta tapno maipanamnama ti kinatalged ti publiko kabayatan iti maisayangkat a BARMM Parliamentary Elections inton October 13, 2025.
Daytoy ket kalpasan a simmarungkar ni Philippine Army Chief Lieutenent General Antonio Nafarrete iti 6th Infantry “Kampilan” Division idiay Datu Odin Sinsuat, Maguindanao Del Norte.
Malaksid nga adda dagiti suldado manipod 6th Infantry Division a maipatulod,adda metlaeng dagiti tropa iti 1st ken 11th Infantry Division nga agserbi a kanayonan nga augmentation kadagiti daduma pay a paset iti Bangsamoro kas iti Basilan, Lanao Del Sur, Maguindanao, Tawi-Tawi, ken Cotabato City.
Sigun kenni Nafarrete,napateg ti akem dagiti suldado para iti umadani nga eleksyon iti Bangsamoro Autonomous Region in Muslim Mindanao nangruna ti panangpatalinaed iti kapya ken kinatalged.
Kabayatanna, nasurok metten a 9,731 a kameng iti Philippine National Police iti nasao a rehiyon ti agdama a nakadeploy bayat ti panakaiyimplimintar iti gun ban a nangrugi idi laeng August 14.
