--Ads--
Dumanonen iti 800 a tattao ti pimmusay iti Kunar Province idiay Afghanistan gapu iti Magnitude 6.0 a ginginged a dimmalpos idi laeng kalman.
Malaksid iti dayta, pimmusay met ti 12 a sabali pay manipod Nangarhar Province bayat a 255 dagiti nadangran.
Sigun iti US Geological Survey, agarop 1.2 million a tattao ti nakarikna iti napigsa a panagdayyeg.
Sigun met iti interior ministry spokesman, adu a babbalay ti nadadael nangruna ket kaadwan kadagitoy ket low-rise ken naaramid manipod iti mud-brick a nalaka laeng a marba.
Iti agdama, agtaltalinaed a saan madalyasat dagiti dadduma a kalsada kadagiti nadakamat a lugar.
Kabayatanna, rinugyan metten ti United Nations ti mangipatungpal iti rescue efforts kadagiti lugar a nakaro a naapektaran.
