Naoperaan ti agtawen iti 20 a lalaki kalpasan a nagsagrap iti serious injuries manipud iti pannakaidungparda iti maysa a pick up sadiay Kennon Road Camp 3 Proper, Tuba, Benguet itay nabiit.
Maibasar iti report ti Tuba Municipal Police Station, ti biktima ket residente sadiay Magsaysay Drive, Loakan Proper, Baguio city.
Nabigbig met ti angkasna nga agtawen iti 19, maysa a college student ken residente metlaeng ti nadakamat a lugar.
Kabayatanna, maysa a lalaki nga agtawen iti 30 ken self employed a residente sadiay Central Buyagan, La Trinidad, Benguet ti driver ti pick up.
Iti initial nga imbestigasyon ti pulisya, paturung ti pick up iti siudad ti Baguio idi kellaat a nag-encroached ken naidungpar iti kasabatna a motor.
Gapu iti dayta, natumba ken naipurwak iti bound lane ti driver ti motor ken ti angkasna.
Dagus a nagresponde dagiti otoridad ken kameng ti Camp 3, Barangay Disaster Risk Reduction and Management Committee (BDRRMC).
Nagsagrap ti serious injuries ti driver iti motor bayat a nagsagrap ti minor injuries ti angkasna a nakaruar iti ospital.
Naikeddeng nga awan ti maipila a kaso ngem nagkiddaw ti ama ti driver ti motor ti inya man a financial Support para iti angkas ti anakna.//Bombo Noveh Organo
