Maragsakan ti sigud a Philippine Basketball Association player ken agserserbi a coach kalpasan a naala ni Claude Camit iti Philippine Basketball Association (PBA) Rookie Draft 2025.
Ti resulta ket naipablaak idi Domingo, September 7, nu sadinno lima pulo laeng ti napili manipod iti 126 draft applicants a nangipakita ti kinalaingda iti nagduduma a drills ken work outs.
Iti pannakiuman ti Bombo Radyo kenni Benedict Fernandez III, sigud a Philippine Basketball Association player, kinunana a maragsakan daytoy gaputa adda manen ti mabuya a nagtaud iti siudad ti Baguio.
Imbalakadna kenni Camit nga adu pay ti mabalin a dalyasatenna iti karerana ti basketball nangruna iti pannaki-ay-ayamna idiay Manila.
Kas maysa a coach, imbalakadna pay kenni Camit a kasapulan nga ag-excel daytoy gaputa adu ti mabalin a mangala kenkuana a bunggoy.
Kinunana pay kenni Camit a rumbeng a makidanggay iti bunggoy a pakipasetanna gaputa nagduduma iti ugali dagitoy, agdengngeg kadagiti coaches wenno agbalin a “coachable,” rumbeng a na-hassle ken sukimaten ti bagi nu makasursurot iti ay-ayam.
Sigun kenkuana, rumbeng nga agrugi paylaeng ni Camit iti defense, gaputa maamuanna tu metlaeng ti offense.
Kabayatanna, inaklon ni Fernandez a mapaspasamak ti “palakasan system” iti uneg ti Philippine Basketball Association tapno laeng makastrek ti maysa a player.
Sigun kenkuana, kasapulan gamin ti tulong iti uneg ti nasao nga organisasion.
Maibasar iti napasaran ni Fernandez, kinumpirmarna nga adda ti maaw-awagan a “palakasan” nga isut rason a nasakit ti nakemna.
Nupay kasta, imbalakadna kenni Camit a rumbeng a nakasagana daytoy iti kapada a pakaseknan.
CLICK TI WATCH: https://www.facebook.com/BomboBaguioOfficial/videos/1148922767125145
