Binabalaw ni Party-list Rep. Terry L. Ridon ni Baguio City Mayor Benjamin B. Magalong idi kalman, ken inakusaranna a hipokrito wenno aginsisingpet gapu iti panangilaksidna iti panangsukimat iti maysa a proyekto ti siudad a mainaig iti kontrobersial a kontraktor.
Sigun kenni Ridon, rumbeng a saan a liklikan ni Magalong dagiti damag nu pudno a supsuportaranna ti “transparency” ken “good governance.”
Daytoy ket iti tengga ti isyu ti P110-milion a proyekto ti tennis court iti siudad ti Baguio, a nakairamanan ti maysa a kompania a kukua ti pamilia Discaya.
Iti agdama, manarimaan ti imbestigasion iti pamilia Discaya gapu iti mapapati nga akemda kadagiti ghost ken substandard flood control projects.
Impunto ni Ridon a mangpataud daytoy kadagiti saludsod maipapan iti desision ni Magalong a mangtangdan a kas iti kompania ni Discaya.
Inaklon ni Magalong, sigun kenni Ridon, a subcontractor laeng ti naki-deal iti siudad— banag nga agpada nga im-imbestigaran ita ti Senado ken Kamara kas maysa a “red flag.”
Sigun kenni Ridon, masansan a maar-aramat dagiti kita ti “arrangement” a mangabbong iti nakapuy a kalidad ti trabaho ken kasapulan daytoy a sukimaten, nangruna nu nairaman ti pondo ti publiko.
Inlawlawag ni Ridon nga awan pay ti ebidensia nga adda ti corruptions wenno kickbacks iti proyekto ti Baguio iti agdama
Nupay kasta, adda dagiti pakaseknan a mabalin a saan a nasayaat ti kalidad ti proyekto.
Kinunana nga umno laeng nga agsaludsod ti publiko ken uray dagiti opisyales a mangitantandudo iti good governance ket masapul met a silulukatda iti imbestigasion.
Binabalawna pay ni Magalong gapu iti panagulimekna.
Innaganam ni President Ferdinand Marcos Jr. ti Discaya idi Agosto, ken inaklon ti pamilia a kontroladoda ti sumagmamano a kompania, ngem awan ti imbaga ni Magalong maipapan iti proyekto ti Baguio agingga a rimmuar ti damag iti maudi a lawas ti Setiembre, sigun kenni Ridon.
Kabayatanna, sinungbatan ni Baguio City Mayor Benjamin Magalong ti akusasyon ni Rep. Terry Ridon a hipokrito daytoy seknan iti tennis court project a nai-award iti kompania ti pamilia Discaya idi tawen 2022.
Impaganetgetna a saanda a nakibiang iti bidding ken awan ti impormasion idi a mapapati a maanomalya gayam ti kompania.
Nadlaw pay ni Magalong a nabayag a maaramid ti tennis court isut gapuna nga impaayabna ti Saint Gerrard a kukua ti Discaya ngem naduktalanna a nagpa-sub contract gayam dagitoy.
Innayonna pay a pinagsasawanna dagiti kontraktor a Discaya gapu iti pannakaitantan ken substandard a trabaho dagitoy.
