Insingasing ni Senator Alan Peter Cayetano ti snap elections kadagiti nangangato a posisyon iti gobyerno kas iti presidente, bise presidente, senador ken kadagiti kongresista.
Daytoy ket gapu ta patien ni Senator Cayetano a kumarkaron ti panakapukaw ti panagtalek dagiti umili iti nasyunal a gobyerno.
Iti statement, kinuna ni Senator Cayetano nga iti baet nga adda dagiti pudno a sumupsuporta kadagiti pulitiko, saanen a mailibak nga iti agdama ket dagitoy dagiti makitkita a suspek kadagiti iregularidad.
Impettengna a saan a mababalaw dagiti umili nu napukawen ti talekda kadagiti opisyales iti gobyerno.
Innayonna a magun-od laeng ti pudno a panagbalbaliw nu dagiti agserbi ket napudno, ken natured a mangaklon nu kasapulandan ti aglusulos iti takem.
Ti singasing ti senador ket impaayna kagiddan ti imbestigasyon kadagiti naanomalyaan a flood control projects iti pagilian a nakairamanan dagiti daduma a nangangato nga opisyales iti gobyerno.
