BAGUIO CITY – Inlawlawag ni Atty. John Paul Martin, Election Officer ti COMELEC-Baguio ti pannakaipatungpal ti Snap election wenno emergency election.
Iti interview ti Bombo Radyo kenkuana, kinunana a ti Snap election ket nasapa a pannakaisayangkat ti eleksion.
Innayonna a naudi a naisayangkat daytoy iti pagilian idi February 07, 1986.
Inlawlawag ni Atty. Martin a ti Kongreso ti otorisado a mangisayangkat iti daytoy.
Maipalagip nga insingasing ni Senator Alan Peter Cayetano ti pannakaisayangkat ti Snap elections kadagiti nangangato a posisyon iti gobierno kas iti presidente, bise presidente, senador ken kongresista.
Insingasingna daytoy gaputa patienna a kumarkaro ti panakapukaw ti panagtalek dagiti umili iti National Government.
Nupay kasta, kinuna ni Atty. Martin a ti 1987 Constitution ti nangikeddeng iti National Election.
Gapu iti dayta, in-valid ti Snap Election no, dagiti karaman ket dagiti nabotosan iti National Election kas iti Presidente, Bise Presidente, Senador ken Kogresista nga inkeddeng ti 1987 Constitution.
Impeksa ti nasao nga Abogado a kasapulan a maamyendaran pay nga umuna ti 1987 Constitution, sakbay a maipatungpal ti Snap Election kadagiti nabotosan iti National Election.
Kabayatanna, inyunay-unay ni Atty. Martin nga iti kanito a saan a maisayangkat ti Snap Election, bilinenda manen dagiti botante a pilienda a nasayaat dagiti ibotosda intun sumaruno nga eleksion.//mp4
