Impanamnama ni Health Secretary Teodoro Herbosa a nakasagana ti surge capacity dagiti Department of Health (DOH) hospitals a ma-activate tapno mangipaay iti tulong kadagiti pasyente kaspangarigan dumalapos ti napigsa a ginggined kas iti The Big One.
Sigun kenni Herbosa, ti surge capacity ket mangipaay iti kanayonan a 10% iti bed capacity ti maysa a DOH hospital.
Kinunana a binilinnan dagiti nasao a pagagasan nga agsagana dagitoy gapu ta kasapulan a mabaelanda a nayunan ti kapasidad dagitoy nga iyakomodar dagiti pasyente iti sangapulo a porsiento.
Maipalagip nga immunan a nagballa-ag ti Philippine Institute of Volcanology and Seismology (Phivolcs) a ti maaw-awagan a Big One wenno ti magnitude 7.2 a ginggined ket mabalin a mangkettel kadagiti nasurok 33,000 a tattao ken mangitunda iti panakarpu-og dagiti 160,000 a pasdek.
