Maibilang itan a kabaknangan ti siudad ti Baguio iti ruar ti National Capital Region (NCR) ken ad-adda a nabakbaknang ngem ti pito a lugar iti National Capital Region, kas maibasar iti 2024 economic performance.
Sigun kenni Aldrin Federico Bahit Jr., PSA chief statistician ti Cordillera, pakabuklan a maika-sangapulo ti siudad kadagiti highly urbanized cities iti Pilipinas numan pay nabuntog iti gross city domestic product (GDP), a bimmaba iti siam a porsiento wenno P169.02 billion iti tawen 2023 agingga iti 5.8 a porsiento wenno P178.85 billion.
Ti GDP ti siudad ket mangipatarus iti per capita output a P485,433 kadagiti tagilako ken serbisio a napataud iti tunggal tao.
Agtaltalinaed nga industriya ken serbisio ti kangrunaan a rason ti panagsayaat ti ekonomia ti Baguio idi napalabas a tawen.
Iti baet daytoy, kinuna ni City Planning Officer architect Donna Rillera Tabangin, saan pay unay nga inabrasa dagiti umili ti wealth ranking ti Baguio, a nangtignay kadagiti opisial ti siudad a mangpanunot no ania ti mabalin a paggastuan tapno sumayaat ti aglawlaw ti siudad ken pakabuklan a kalidad ti biag.
Sigun kenni Tabangin, manarimaanen ti panangisayangkatda iti “quality of life” survey tapno ad-adda a maawatan no apay nga iyebkas dagiti umili ti reserbasionda maipapan iti balligi ti ekonomia ti Baguio.
