Baguio City- Kinomendaran ni Benguet Cong. Eric Go Yap ti Bureau of Customs (BOC) kalpasan ti naballigi a pannakakumpiskar dagiti imported carrots manipud China nga aggatad iti P13.2 million idi napalabas a lawas.
Dumanon iti 53,000 kilos ti smuggled carrots ti nadiskobre ti BOC-POM Alert Monitoring idiay Port of Manila. Sigun iti Benguet Representative, ti iligal ken agtultuloy nga iseserrek dagiti nateng iti sabali a pagilyan ket mang-apapektar iti pagbiagan dagiti mannalon.
Mangnamnama pay ti opisyal nga agbalin nga agresibo ti gobierno a mangidarum iti kaso kadagiti adda iti likudan iti nasaknap a vegetable smuggling.
Gapu iti daytoy ket mangnamnama ni Yap nga agbalin a naan-anay a linteg ti isaksakad na a House Bill 1511 wenno gakat tapno maikkan ti bileg ti Department of Agriculture a mang-regulate dti farmgate prices dagiti highly perishable vegetables kas iti green beans, broccoli, cabbage, carrots, cauliflower, chayote, lettuce ken dadduma pay.
Malaksid iti dayta ket immunan a naipila idiay Kongreso ti House Bill 4969 wenno ti Free Index – Based Agricultural Insurance bill a mangited ti naan-anay a proteksyon kadagiti mannalon iti agbalin nga epekto dagiti kalamidad kas iti idadalapos dagiti bagyo.
Iti nasao a gakat ket ditoy a masukatan dagiti daanen a pagalagadan iti napartak a data-based support para kadagiti vegetable stakeholders tapno maipasigurado a dumteng ti assistance ken tulong manipoud iti gobierno babaen iti mas natalged, napartak ken farmer-friendly food system.
