Impakaammo ti Department of Health (DOH) nga adda dagitoy iti code white alert tapno masigurado a nakasagana ken alisto ti panagresponde dagitoy kadagiti naapektaran iti Bagyo a Tino iti Visayas ken Mindanao.
Mangipatpatungpal metlaeng ti DOH Operations Center iti 24/7 a panagmonitor iti sitwasion tapno dagus a marespondian dagiti apektado a lugar.
Maipalagip a ti code white alert ket mangsigurado iti kinasagana dagiti amin a medical ken psychosocial support services a kasapulan a mangresponde kadagiti posible nga emerhensia.
Kabayatanna, impasigurado ti DOH sadiay Central Visayas nga umdas ti agas ken nalinis a danum para kadagiti residente a naapektaran iti bagyo sadiay Cebu.
Nangiwaras metten ti DOH sadiay Eastern ken Western Visayas ti agas, health commodities, ken hygiene kits kadagiti residente a temporaryo nga agnanaed kadagiti evacuation centers.
