Nagpalagip ti Department of Health (DOH) iti publiko ti kinapateg ti kinadalus ti aglawlawa tapno masigurado a saan a makauneg ti hantavirus iti pagtaengan.
Inlawlawag ni Health spokesperson Undersecretary Albert Domingo a napateg ti kinadalus iti uneg ti pagtaengan.
Innayon daytoy a nu adda dagiti otot ken rugit iti uneg, saanen nga urayen a matapukan dagitoy sakbay a dalusan ket agaramat ti gloves tunggal agdalus.
Iti agdama, awan pay laeng ti bakuna wenno partikular nga agas tapno malabanan ti hantavirus.
Sigun met iti French National Public Health Agency, ti laeng pamay-an tapno maminimize ti pangta ti impeksyon ket liklikan ti kontak kadagiti otot, rugit, isbo, ken katay dagitoy.
Inlawlawag met ti World Health Organization (WHO) Europe director Hans Kluge, saan a kadawyan a sakit ti hantavirus nupay saan a nalaka a maiyakar iti dadduma a tao. //bombokaren.c.s
