Idagdagadag ti Department of Social Welfare and Development–Cordillera kadagiti amin a munisipyu iti rehion a mangibangon iti bukodda a warehouses para iti panangi-preposition kadagiti tulong ti gobierno tapno maipasigurado ti naparpartak nga access bayat ti didigra wenno emerhensia.
Sigun kenni DSWD-Cordillera RD Maria A. Catbagan-Aplaten, dumanon iti sangapulo ket tallo a lokal a gobierno ti mangipasdek paylaeng ti warehouse wenno mangpirma ti memorandum of agreement iti DSWD iti panangi-preposition dagiti relief goods.
Pakairamanan daytoy ti dua a munisipyu idiay Abra, maysa idiay Apayao, tallo iti Benguet, dua idiay Mountain Province, ken lima idiay Kalinga.
Sigun kenkuana, amin a munisipyu idiay Ifugao ket nakumpletodan ti katulaganda iti DSWD-CAR.
Inlawlawag ni Aplaten a kasapulan a masurot dagiti specific standard iti panangibangon kadagiti DSWD warehouses a kas ti naan-anay nga espasyo tapno pangidulinan ti suplay para iti one-third a babbalay, ken dadduma pay.
Impeksana a saan a maragsakan daytoy uray maysa laeng a kahon ti madadael. Kayatna a makadanon kadagiti benepisiario a nasayaat dagiti maipaay a tulong.
Umap-apela pay daytoy iti lokal a gobierno a bigbiigenda ti kinapateg ti “prepositioned goods’ ken mangilatang ti naan-anay nga storage areas para kadagiti masakupanda nga umili.
