Nagpakdaar ti Cybercrime Investigation and Coordinating Center (CICC) kadagiti online shoppers nga agannad ita panawen ti bakasion gapu iti posible a panagraira dagiti mananggundaway a scammers.
Sigun kenni CICC Undersecretary Renato “Aboy” Paraiso, kadawyan a punteria dagiti scammers dagiti e-commerce platforms agsipudta, nalaka a makombiser dagiti online shoppers.
Karaman kadagiti ar-aramaten dagitoy ti panangipaayda ti dakkel a discount, nababa a presio no idilig kadagiti addaan iti physical stores ken dagiti peke a testimonia kadagiti produkto.
Ibalbalakad ni Paraiso a nasaysayaat a gumatang kadagiti lehitimo laeng nga online shopping apps agsipudta, addaan dagitoy ti security features ken naipasigurado a nasayaat ti kalidad ti produkto dagitoy.
Malaksid iti dayta, kidkiddawen ti nasao nga opisial kadagiti shoppers nga agridam iti panaggatang iti online stores; saan a dagus a patien dagiti maidiaydiaya a diskuento, nababa a presio, napipintas a testimonia kadagiti produkto ken dadduma pay nga ar-aramiden dagiti scammers tapno makaguyugoy iti adu a kustomers.
