Kinondinar ti organisasion dagiti retired military generals ken opisiales ti maatap nga awag para iti destabilization.
Maibasar iti manifesto a pinirmaan dagitoy, binigbig ti Association of General and Flag Officers, Inc. (AGFO) ti agdama a kasasaad ti politika ti pagilian.
Inaklonda pay nga ammoda dagiti awag a mangidagadag iti AFP a saanda a suportaran ni President Ferdinand Marcos Jr.
Nupay kasta, impaganetget ti AGFO nga agtultuloy ti panangitandudo ti militar iti Konstitusion ken ti prinsipio ti civilian supremacy iti baet ti panagretiro dagitoy.
Sigun iti nasao a grupo, kondenarenda ti aniaman nga awag iti AFP a makipaset kadagiti aramid a maikontra iti konstitusion wenno military adventurism.
Makalanad pay iti nasao a manefisto a supsuportaranda ti Article XVI, Section 5 ti Konstitusion.
Mangibilin daytoy a ti Armed Forces ket saan a makipaset iti aniaman a partisan political activity, direkta man wenno saan, malaksid laeng iti panagbutos.
