Nagkiddaw ni Davao City First District Rep. Paolo Duterte iti clearance tapno agbiahe iti 17 a pagilian manipud Disiembre 15, 2025 agingga Pebrero 20, 2026.
Maibasar iti surat nga impalud ni Duterte iti opisina ni House Speaker Faustino “Bojie” Dy III a napetsaan idi Desiembre 1, 2025, kinunana a panggepna nga agtravel sadiay Hong Kong, China, Malaysia, Indonesia, South Korea, Japan, Vietnam, Cambodia, United States, Australia, United Kingdom, the Netherlands, Germany, France, Belgium, Italy, ken Singapore.
Sigun kenni Duterte, dagiti gatos nga aramatenna iti nasao travel daytoy ket manipud iti personal a kuartana.
Nagkiddaw pay daytoy iti pammalubos a dumar-ay kadagiti plenary sessions ti Kamara ken taripnong babaen iti virtual bayat nga adda daytoy iti ballasiw-taaw.
