Mabalin itan a maipaayan iti pannusa dagiti driver iti Transport Network Vehicle Service (TNVS) a saan a nainkalintegan a mangkanselar kadagiti bookings dagitoy nga immunan nga inawatda babaen iti digital platform.
Daytoy ket kasaruno iti panangipaiyulog iti Land Transportation Franchising and Regulatory Board (LTFRB) iti Memorandum Circular No. 2025-055 a napirmaan idi laeng kalman.
Iti bileg ti nasao a pagannurutan, sumango iti reklamo a “refusal to convey passengers” dagiti driver a mangubra iti nadakamat nga aramid malaksid laeng nu adda pakainaigan ti panagkanselarda kadagiti emerhensiya kas iti didigra, car maintenance issues, ken passenger behavior.
Sigun kenni LTFRB Chair Vigor Mendoza, naipaiyulog ti nasao a pagannurutan kalpasan a nakaawatda kadagiti adu a reklamo manipod kadagiti komyuter seknan iti panagraira iti booking cancellations nangruna kadagiti lugar nga addaan nailet a gunay iti trapiko.
Ti tignay iti nasao nga opisina ket kas panagsagana metlaeng iti kapada a modus ita nga umadanin ti Paskua.
Dumanon iti ₱5,000 ti multa dagiti aglabsing ti umuna a gundaway; ₱10,000 para iti naikadua a sunot ket panakaimpound iti lugan iti 30 nga aldaw; bayat a ₱15,000 met a multa para iti third offense ken panakakanselar iti Certificate of Public Convenience dagitoy.//Rob
