Imonmonitor met ti Department of Foreign Affairs (DFA) ti kasasaad dagiti Pilipino idiay Iran kasaruno ti napasamak a tignay-protesta a nalaukan iti kinaranggas a nakaitunda iti ipupusay ti saan a bumaba iti pito nga indibidwal.
Sigun iti nasao nga ahensya, adda iti mapatta-patta nga 800 a Pilipino idiay Iran iti agdama ngem maibasar iti kaudian a report daytoy ket awan pay ti nakumpirmar a naapektaran a Pilipino sidiay gapu iti protesta.
Gapu iti dayta, nagbalakad daytoy iti Filipino community idiay Iran a liklikanda paylaeng ti rumwar nangruna ti panagturong kadagiti natao a luglugar kasta metten a nabilin dagitoy nga umawagda iti embahada iti Pilipinas nu kasapulanda ti tulong.
Ti tignay-protesta idiay Iran ket dandani makalawasen a maipatpatungpal mainaig iti nguminngina a cost of living sadiay ken ti panangimanihar iti gobyerno iti panagbaba iti Iranian rial.
Kasaruno ti sumagmamano nga aldaw a rally, kiniddaw ni Iranian President Masoud Pezeshkian iti gobyernoda a denggen dagitoy ti “legitimate demands” dagiti protestante ken inkarina salaknibanda ti pagbiagan dagitoy.
