Naikkat iti serbisyo dagiti onse a kameng iti pulisya kalpasan a napaneknekan a dagitoy ket guilty iti kaso a grave misconduct ken conduct unbecoming of a police officer gapu iti pakainaiganda iti kaso dagiti missing sabungero.
Iti waragawag iti National Police Commission (NAPOLCOM) idi kalman, dagiti kameng ti pulisya a guilty iti kaso nga administratibo ket pakairamanan da Police Lieutenant Colonel Ryan Jay Eliab Orapa, Police Major Mark Philip Simborio Almedilla, Police Executive Master Sergeant Aaron Ezrah Lagahit Cabillan, Police Chief Master Sergeant Arturo Opalla Dela Cruz Jr., Police Senior Master Sergeant Joey Natanauan Encarnacion, Police Senior Master Sergeant Mark Anthony Aguilo Manrique, Police Senior Master Sergeant Anderson Orozco Abary,Police Staff Sergeant Alfredo Uy Andes, Police Staff Sergeant Edmon Hernandez Muñoz, Police Corporal Angel Joseph Ferro Martin,ken Police Staff Sergeant Renan Lagrosa Fulgencio.
Mainaig iti dayta, nairekomendar metlaeng ti panakaikkat iti serbisyo ni sigud a Criminal Investigation and Detection Group (CIDG) Chief Police Brigadier General Romeo Macapaz gapu iti maatap a panang-ikkatna iti mensahe dagiti agkabsat a Julie “Dondon” Patidongan ken Elakim Patidongan—dagiti naibilang a whistleblower iti kaso dagiti mapukpukaw a mammallot.
Nupay kasta, inlawlawag ni NAPOLCOM Vice Chairperson ken Executive Officer Rafael Vicente Calinisan a ti nasao a rekomendasyon ket kasapulan pay a dumalan iti presidential clearance nangruna ket addaan daytoy iti saad a nangatngato ngem iti police colonel.
