Kinumpirmar ti International Criminal Court’s (ICC) Pre-Trial Chamber a “fit” wenno kabaelan ni sigud a Presidente Rodrigo Duterte ti sumango iti pre-trial proceedings daytoy inton Pebrero 23, ita a tawen.
Sigun iti ICC, tallo a medical experts ti nangtaming iti sigud a presidente ken naisumitir ti report dagitoy idi Disyembre 5 idi napalabas a tawen.
Innayun pay ti ICC a gapu iti resulta ti naipatungpal a medical examination, mamatida a kabaelan ti sigud presidente nga umatendar iti nasao a pre-trial proceedings.
Maamwan iti nasao a proceedings nu naan-annay dagiti ebidensiya iti kaso a sangsanguen ni sigud a president Rodrigo Duterte.
Nu makitada nga umdas dagiti ebidensiya iti kaso kontra kenkuana, maiyakaren ti nasao a kaso iti trial chamber para iti pormal a panagdengeg iti nasao a kaso.
Mannarimaan nga adda ni sigud a president Rodrigo Roa Duterte iti kustodiya ICC ken sumangsango iti crimes against humanity gapu iti programa daytoy kontra iti droga idi daytoy paylaeng ti dadaulo ti pagilian a Pilipinas. // via Bombo Karen Calpoe Sapirao
