Kinumpirmar ni Senate President Pro Tempore Panfilo “Ping” Lacson a karaman ti nagan ni sigud nga House Speaker Martin Romualdez kadagiti makasuan iti draft report nga inrekomenda ti Senate Blue Ribbon Committee maipanggep iti naanomalyaan a pondo para kadagiti flood control projects.
Inlawlawag ni Sen. Lacson a karaman ni Romualdez iti maikadua a kategorya dagiti personalidad a nadakamat iti panangdengngeg. Dagitoy dagiti indibidwal a dinakamat dagiti nagtestigo ngem awan pay laeng ti direkta nga ebidensya a nakaawatda ti kwarta.
Sigun pay kenkuana, bayat nga inakusaran ti surpise witness a ni Orly Guteza ti maatap a panangitulodna ti kwarta kada Zaldy Co ken Romualdez, awan ti naiparang nga ebidensya a nakaawat ti sigud nga House Speaker ti kickback.
Malaksid iti dayta, nadakamat manen iti Senado dagiti alegasyon a mangikonkonekta kenni Romualdes kadagiti agasawa a contractor a da Sarah ken Curlee Discaya no sadino ket maatap a panangusar ti “front” iti panaggatang ti high-end property idiay Makati.
Nupay kasta, impetteng ni Sen. Lacson nga awan ti naisumitir nga ebidensya iti hearing tapno mapasingkedan dagiti akusasyon kontra iti sigud nga house speaker. // Bombo Karen Calpoe Sapirao
