Inlawlawag ni Baguio City Councilor Atty. Edison Bilog a saan a kaskarina a maideklara a persona non grata ti maysa nga indibidwal gapu ta kasapulan a masurot ti due process maitunos iti paglintegan iti pagilian.
Daytoy ket kagiddan ti isyu maipapan iti gender-based a panagangaw ni guitar entertainer Romeo Ogong wenno am-ammo iti awag a Southern Cowboy bayat ti panakipagrambakna iti maika-17 nga Ibaloy Day idi February 23.
Sigun kenni Atty. Bilog, ti angaw ni Ogong ket nakainsulto saan laeng a kadagiti Ibaloy nu di ket kadagiti amin a babbae rason a makidkiddaw ti panakaideklarana kas persona non grata.
Iti panakiuman ti Bombo Radyo kenni Atty. Bilog, addan dagiti daduma a kakadwana iti konseho a mangayat nga ideklara ti nasao a Southern Cowboy kas persona non grata ngem impettengna a kasapulan pay a mapalubusan daytoy nga ilawlawag ti bennegna.
Kaspangarigan makita ti konseho a saan a nainkalintegan ti depensa ni Ogong maipapan iti aramidna, mabalinen daytoy a maideklara a persona non grata.
Gapu iti dayta, panggep dagitoy nga imbitaran ni Ogong tapno ilawlawag ti bennegna ken agkiddaw iti dispensar wenno pammakawan.
Sigun kenni Atty. Bilog, iti kanito a saan a patgan ni Ogong ti imbitasyon,posible a maideklara daytoy a persona non grata iti siudad ti Baguio.//Bombo Rob Domiguez
