BAGUIO CITY – Impetteng ni Councilor ken Atty. Lourdes Tabanda a nangipila iti resolusyon a maideklara kas persona non grata ni Southern Cowboy a ni Romeo Ogong.
Kasaruno daytoy iti isyu maipapan iti gender-based a panagangaw ti nasao a singer ken guitar entertainer bayat ti pannakarambak maika-17 nga Ibaloy Day idi February 23.
Maipalagip nga inyangaw ni Ogong nga adu ti malalandi iti siudad ti Baguio ken kinunana a saan a dakes daytoy.
Innayonna pay a mabalin nga agdonar iti sperm no kayatda a maaddaan daytoy iti henerasyon iti siudad ti Baguio.
Iti interview ti Bombo Radyo kenni Atty. Tabanda, kinunanaa saan a maibatbatbat iti okasyon ti inyang-angaw ni Ogong.
Inyunay-unay ti nasao nga opisial a ti nasao nga aktibidad ket impaayan ti city council iti P500,000 a pondo para iti pannakarambak ti kultura.
Inlawlawag daytoy a kas maysa nga advocate iti women’s empowerment saan a pabor iti panagangaw ti nasao a singer.
Gapu iti dayta, mangipila ti nasao nga opisial iti resolusyon tapno maideklara a persona non grata ni Ogong.
Pagbotosan daytoy ti City Council ken masurot no anya man ti panggeddeng ti kaaduan.
Inaklon met ni Councilor Tabanda a sensitive daytoy, nangruna no dagiti babbae ti pagsasaritaan.//mp4
