Nalawlawaganen ti impormasyon a timmaray ti kapitan ti barko nga M/V Trisha Kerstin 3 a limned idi Enero ita a tawen.
Daytoy ket kalpasan a nakumpirmar a karaman gayam daytoy kadagiti pimmusay iti nasao nga insidente.
Sigun kadagiti otoridad, maysa kadagiti pito a bangkay a narekober manipud iti barko ket nabigbig a ni Captain Sonie Secuban, ti kapitan ti M/V Trisha.
Nakumpirmar daytoy dagiti police forensic experts idi ikumparada ti DNA ti nasarakan a bangkay iti anak ti lalaki a kapitan.
Sakbay a naipasardeng ti diving operation iti limned a barko, agarup 65 a bangkay ti narekober bayat a 293 met ti nailista a nakalasat ken 14 nga indibidwal ti agtaltalinaed a saan pay a nasarsarakan.
Iti agdama, mannarimaan latta ti imbestigasyon dagiti otoridad seknan iti nasao a pasamak nangnangruna iti paset a panangpalubos nga agdalyasat ti nasao a barko. //BomboKCS
