BAGUIO CITY- Nadangran ti walo nga indibidual kabayatan ti pannakaisayangkat ti fireworks display iti panagleppas ti Panagbenga Festival 2026, pasado 7:55 ti rabii, March 08, 2026.
Sigun iti Baguio-PNP, napasamak ti insidente iti skating rink sadiay Burnham park.
Maibasar iti inisyal nga imbestigasyon, pakairamanan daytoy dagiti agtawen iti tallo,17, 18, 26, 36, 47, 50 bayat a maysa kadagiti biktima ket saan paylaeng a nabigbig ti edad daytoy.
Dagiti nasao a biktima ket buklen ti uppat a babbae ken uppat a lallaki nga agpapada a turista manipud sadiay Pangasinan.
Sigun kadagitoy, timmama ti maatap a fireworks iti Styrofoam matting a nangitunda iti panagbettak daytoy.
Maysa kadagiti biktima manipud syudad ti Baguio ti manarimaan a mangal-ala iti video no sadino, nakapwesto iti likudan dagiti pito metlaeng a nadangran a turista.
Gapu iti dayta, nasugatan ti makin-kanawan nga abaga daytoy.
Dagus metten a nagresponde ti Scene of the Crime Operations wenno Scene of the Crime Officers/Operatives (SOCO) tapno masukimat ti nasao nga insidente.
Manarimaan metlaeng ti panagimbestigar dagitoy tapno mabigbig ti espesipiko a nagtaudan ti maatap a fireworks.
Kabayatanna, naiturong metten iti ospital dagiti biktima gapu iti minor injuries para iti kanayunan nga obserbasyon.
Iti agdama, agtultuloy paylaeng ti imbestigasyon dagiti otoridad iti napasamak nga insidente.// via Bombo Noveh Organo
