Nangipila iti reklamo da Mamamayang Liberal Party-list Rep. Leila De Lima ken Fr. Flavie Villanueva kontra kadagiti 18 a sigud a Marines, pakairaman ni Atty. Levito Baligod.
Impilada ti reklamo a ‘libel’ ken ‘cyber-libel’ kontra kadagiti nasao nga indibidual.
Sigun kenni Rep. Leila de Lima, nangipilada iti reklamo gapu iti panangdadael dagitoy kenkuana.
Nagtaud ti reklamo iti alegasion a linaon ti ‘joint-affidavit’ ti grupo a mangibagbaga a nakaawatda iti ‘paper bag’ wenno maleta a naglaon iti minilion a pisos ti kuarta.
Sigun met kenni Fr. Flavie Villanueva, impilada ti reklamo kas protesta kontra kadagiti defamatory statements nga inaramid ti grupo.
Kabayatanna, kalpasan ti panangipilada kadagiti reklamo iti National Bureau of Investigation, dagusda a nagturong iti Department of Justice tapno mangipila iti naisina a kaso.
Iti nasao departamento, nangipilada iti ‘perjury complaint’ kontra kadagiti 18 a sigud a Marines a nagpirma iti ‘joint-affidavit’ a naisubmitir iti Office of the Ombudsman.
Kabayatanna, impetteng ni Rep. De Lima nga ulbod ti alegasion a nakipagkita daytoy kenni sigud a House of Representatives Speaker Martin Romualdez.
Pinaglibakanna pay ti alegasion a nakaawat iti ‘paper bag’ a naglaun iti kuarta.
