Impanamnama ti Philippine National Police a saan a maapektaran ti police operations iti baet ti initiatiba ti gobyerno a panagtipid ti enerhiya kadagiti pasilidad gapu pay laeng iti panagngato ti presyo ti produkto a petrolyo ken dadduma a gagatangen iti pagilian.
Sigun kenni Philippine National Chief Police General Jose Melencio Nartatez Jr., agtaltalinaed latta ti operasyon ti kapulisan kadagiti komunidad iti pagilian.
“Our personnel remain on duty 24/7 to protect our communities,” dinakamat daytoy.
Kas panagtulnog iti initiatiba ti gobyerno, nangipaulog metlaeng ti nasao nga ahensiya ti memorandum a mangibilbilin kadagiti amin a police units nga agtipid ken kissayanda ti electricity ken fuel consumption nu mabalbalin.
Malaksid iti dayta, dinakamat pay ti nasao nga ahensya nga obserbaranda dagiti energy-saving measure kas iti rationalized deployment ken panangkissay kadagiti non-essential travel dagiti personnel.//Bombo Karen Sapirao
