BAGUIO CITY – Impetteng manen ti Pagkakaisa ng mga Samahan ng Tsuper at Operator Nationwide (PISTON) a saan nga ayuda ti solusyon iti panagrigat dagiti transport group ita a mapaspasaran ti nangato a presyo dagiti produkto a petrolyo gapu iti tension idiay Middle East.
Iti interview ti Bombo Radyo, kinuna ni Mike Cabangon, dadaulo ti PISTON-Cordillera a ti panangipaay iti ayuda kadagiti transport sector ket saan a makatulong agsipud ta saan nga amin ket maipaayan ken adda pay dagiti gundaway a dagiti operator laeng ti makaaw-awat iti daytoy.
Innayon pay ni Cabangon a ti panangipaay iti ayuda ket maysa pay a pagrugrugian ti korupsyon.
Inyunay-unayna a ti dawdawatenda ket ti pannakaikkat ti 12% vat ken excise tax gapu ta nu mapasamak daytoy ket P15 a dagus ti maikissay iti presyo dagiti produkto a petrolyo.
Impaganetget ni Cabangon a daytoy ti nabayag a dawdawatenda iti gobyerno pakairamanan ti pannakaamyendar ti Oil Deregulation Law.
Inlawlawag ti nasao nga opisyal a ti nasao a linteg ket isu ti nangipaay iti bileg kadagiti oil companies a mangipangato wenno panangipababa iti presyo dagiti produkto a petrolyo iti kanito a kayaten dagitoy.
Inyarig ni Cabangon a dagiti oil companies ti agbalbalinen a mouthpiece ken saan a ti gobyerno gapu iti oil deregulation law.
