Tinalantan iti City Veterinary and Agriculture Office (CVAO) ti ordinansa iti siudad seknan iti micro-chipping ken dog tags para kadagiti aso a naisayangkat iti City Hall Hours, kas paset iti Rabies Awareness Month ken kampania iti responsable a panangaywan iti taraken nga ayup.
Sigun kenni CVAO Senior Agriculturist Dr. Wilson Malingan, dumanon iti agarup 40,000 nga aso ti nairehistro iti siudad, bayat a saan pay a karaman dagiti nairehistro a pusa gaputa aso laeng ti saklaw iti agdama nga ordinansa.
Inlawlawagna nga “optional” laeng ita ti micro-chipping, ken mabalin nga agpili dagiti pet owner nu microchip wenno dog tag ti aramatenda kas pakabigbigan iti tarakenda nga ayup.
Panggep iti programa a tulungan dagiti otoridad a maamuan dagiti agtagikua iti maaw-awan wenno addaan iti rabies nga ayup tapno mapalaka ti monitoring ken panangrisut kadagiti insidente.
Kabayatanna, impasigurado ni Malingan nga awan ti scientific evidence a mangituntunda iti kanser wenno panangiyakar iti chip iti dadduma a paset a bagi iti ayup ti micro-chipping.
