Impakaammo ti Department of Trade and Industry (DTI) idi kalman, Marso 28, nga agtaltalinaed a normal dagiti presyo dagiti basic needs iti tenga ti panangngato ti presyo ti produkto a petrolyo gapu iti tensyon idiay Middle East.
Nupay kasta, kinunana a posible a ngumato ti presyo dagitoy iti katengaan ti bulan ti Abril iti agdama a tawen.
Sigun kenni Trade Secretary Cristina Roque, awan pay laeng ti nairekord da a panagngato ti presyo dagiti basic needs ken prime commodities iti merkado.
Kabayatanna, naadaan ti meeting ti nasao nga ahensya kadwa dagiti manufacturer ken retailers no sadino impasiguradona ti umdas a suplay ken imbentaryo dagiti basic needs tapno maliklikan ti killaat a panagngato ti presyo dagitoy iti merkado.
Karaman kadagiti nainget nga imonmonitorda ket ti presyo dagiti de-latang sardinas, corned beef, cup noodles, bottled water, kape, gatas, ken dadduma a dairy products, ken kandila.
Inlawlawag ni Roque a saan nga amin a produkto ket karaman iti listaan ti imonmonitorda gapu ta posible nga agbaliw dagiti presyo dagiti sumagmamano a brands wenno variants.
Nagpalagip daytoy iti publiko a kitaenda dagiti impablaak ti nasao nga ahensya a listaan dagiti presyo dagiti basic necessities ken prime commodities kadagiti grocery, supermarket, kasta meten kadagiti opisyal a website ken social media pages ti nasao nga ahensya.
Innayon daytoy nga agtultuloy ti linawas a meetingda kadua dagiti manufacturers para iti monitoring ti sitwasyon nangnagruna iti katengaan ti bulan ti Abril no sadino manamnama ti panagbaliw ti presyo dagiti nagduduma a produkto iti merkado. //bombokaren.c.s
