Bimmaba ti presio ti lana iti umuna a tallo nga aldaw ti trading iti world market, kalpasan ti ceasefire agreement iti nagbaetan ti Estados Unidos ken Iran.
Manipud Abril 6 agingga 8, nailista ti panagbaba ti presio ti diesel kadagiti pagtataudan ti suplay.
Iti kanito nga agtultuloy daytoy, posible a bumaba iti P2.50 tunggal litro agingga P3.40 tunggal litro ti diesel.
Kabayatanna, posible a bumaba iti P1.00 tunggal litro ti presyo ti gasolina.
Immunan a kinuna ni Energy Secretary Sharon Garin, a saan a dagus a bumaba ti presyo ti petrolyo iti pagilian iti baet a temporaryo a simmardeng ti tesion sadiay Middle East.
Innayon daytoy nga agtaltalinaed a nangato ti delivery costs bayat nga adda pay dagiti nadadael nga oil infrastructure a nangapektar iti supply chain.
