Manamnama nga adadda a mapalag-an ti bakbalayen a rigat dagiti Pilipino nga ada ti an-anayenna gapu iti pormal a panangipablaak ti Bureau of Internal Revenue (BIR) ti baro a listaan dagiti agas a saanen a mapatawan iti Value Added Tax wenno VAT.
Babaen iti Revenue Memorandum Circular (RMC) No. 27-2026 a nai-isyu idi Abril 8 iti agdama a tawen, indeklara ti nasao nga ahensya a VAT-exempted ti agarup 2,263 nga agas nga immunan nga inaprubaran ken inyendorso ti Food and Drug Administration (FDA) iti Department of Health (DOH).
Maibasar iti breakdown ti ahensya, kaaduwan kadagiti adda iti listaan ket nailatang para kadagiti pasyente nga ada ti kanserna a dumanon iti 702 a klase ti agas.
Sarunuen daytoy ti 535 nga agas para iti hypertension;327 para iti diabetes, 300 para iti mental illness; 171 para iti nangato ti cholesterolna; 152 para iti sakit ti bato; ken 76 para iti tuberculosis.
Ti nasao a tax exemption ket naipatumpal kas mailinya iti probisyon a nakalanad iti Republic Act No. 10963 wenno TRAIN Law ken Republic Act No. 11534 wenno CREATE Act.
Sigun kenni BIR Commisioner Charlito Martin Mendoza, paset daytoy iti mandato ti gobyerno a maibaba dagiti presyo ti medikasyon iti pagilian.
Suportado met ditoy ti Department of Finance nga idadauloan ni Finance Secretary Frederick Go.
Impakaammo ti BIR nga iti sidung ti nasao a direktiba, dagiti baro a listaan ket otomatiko nga mangsukat kadagiti immuna a circulars a naipablaak seknan kadagiti agas. //bombokaren.c.s
