Manarimanen ti imbestigasion iti Philippine National Police (PNP) iti maysa a police training instructor iti rehion Cordillera seknan iti mapapati a panagrames iti maysa a babai a trainee.
Sigun kenni PNP chief Jose Melencio Nartatez Jr., ti 41-anyos nga instructor ket naikabilen iti restrictive custody, naikkaten ti armasna, ken naiyakar iti PNP training headquarters idiay Laguna.
Maibasar iti inisial nga imbestigasion, inreklamo iti 23-anyos a biktima a daytoy ket seksual a naabuso idi Enero 20 ken Pebrero 8 iti uneg iti Cordillera Administrative Region Training Center iti siudad ti Baguio. Sigun kenkuana, pinaayaban ti instructor iti kuartelna a nakapasamakan dagiti insidente.
Nakaipaay metten ti biktima iti sworn statement ken agdama a maipaspasidong iti psychological evaluation.
Kinuna metlaeng ni Nartatez a mapainget ti imbestigasion iti kaso kasaruno ti nagsina a hazing incidente iti PNPA, nu sadinno nasurok 20 a kadete ti nadangran kalpasan ti mapapati a pannakaipasidongda iti napeggad a pannusa idi Abril 3.
Agtultuloy ti imbestigasion iti PNP iti kapada nga insidente.
