Kinumpirmar iti Malacañang a nagikkaten ni Presidential Adviser on Peace, Reconciliation, and Unity Secretary Carlito Galvez Jr., ken sukatan daytoy iti sigud a DILG Secretary a ni Mel Senen Sarmiento.
Ni Sarmiento ket nagserbi kas secretary iti Department of the Interior and Local Government iti sidong iti administrasion ni sigud a President Benigno “Noynoy” Aquino III.
Kabayatanna, ni Galvez ket addaan iti atidog a kapadasan iti serbisio militar, karaman ti panagbalinna nga unified commander iti lima a bulan iti Marawi siege idi 2017, ken nagbalin a chief of staff iti Armed Forces of the Philippines idi 2018.
Kalpasan ti panagretirona, nadutukan daytoy kas peace adviser idi tawen 2018 iti sidong ni sigud a President Rodrigo Duterte. Napateg metlaeng ti nagbalin a papelna kas chief implementer iti National Task Force kontra iti COVID-19 ken kas “vaccine czar” idi pandemia.
Iti sidong iti administrasion ni Marcos, nagserbi daytoy kas officer-in-charge iti Department of National Defense iti umuna a paset iti tawen 2023 sakbay a nadutukan manen kas peace adviser.
