Maal-alarma ita dagiti barangay officials ti Kapangan, Benguet gapu iti pannakatay dagiti ado a kita ti lames idiay Amburayan River nga intunda ti maatap a sabidong.
Iti interview ti Bombo Radyo, kinuna ni Barangay Captain Fredo Agyao, ‘very alarming’ ti insidente gapu ta naapektaran ti pagbiagan dagiti lokal a mangngalap kasta metten ti turismo ti barangay.
Dinakamatna a naobserbaran ti maatap a pannakasabidong ti nasao a karayan idi rabii ti Abril 24, 2026 gapu iti pannakatay dagiti nagduduma a kita ti lames.
Innayonna nga iti agdama ket apektado ti Barangay Cuba ken Barangay Taba-ao bayat a saanda pailaeng nga ammo nu apektado metlaeng ti ngato a paset ti Amburayan river
Imbinglay ni Kapitan Agyao nga adda ti nakalapda nga impormasyon a maatap nga adda ti nagaplikar iti sodium chemical wenno posible nga adda ti napasamak a chemical spill manipud iti pagminasan idiay Sto. Niño, Tublay, Benguet.
Sigun pay iti nasao nga opisyal, naireport metten ti nasao nga insidente iti pulisya ken nangipaayda iti samples dagiti natay nga lames kas ebidensiya.
Malaksid iti daytoy, padpadasenda nga ipa-test ti danum iti Department of Science and Technology tapno makita nu daytoy ket kontaminado.
Impetteng ni Agyao a saan a daytoy ti umuna a gundaway a mapasamak ti maatap a pannakasabidong dagiti lames iti Amburayan river gapu ta napasaranda metlaeng daytoy idi tawen 2019 agingga 2020.
Ti maitudtudo a rason ket ti oil spill manipud iti pagminasan idiay Sto. Niño, Tublay, Benguet.//via Bombo Noveh Grace Organo
