Pinadayawan ni Baguio City Mayor Benjamin Magalong ti disiplina ken kooperasion iti transport sector iti siudad ti Baguio iti agtultuloy a panangipaay iti serbisio publiko iti baet iti epekto iti krisis iti lana iti sangalubungan.
Binigbig ni Mayor Magalong ti desision dagiti transport group a saan a makipaset kadagiti transport strike iti NCR itay kallabes, ken intuloyda kitdi ti operasion para iti pagimbagan dagiti umili ken turista.
Kinunana pay a dakkel metlaeng ti naitulong iti panakikaykaysa dagiti jeepney association iti panangipatungpal iti Emergency Transport Support Program wenno ETSP, a nakatulong tapno maliklikan ti posible a krisis iti transportasion, nangruna iti rabii.
Inallukoy ni Magalong ti sektor nga ituloy ti sakripisioda ken serbisio kas paset iti responsibilidadda iti sidong iti prangkisa nga impaay iti LTFRB.
Impasigurado met iti lokal a gobierno ti agtultuloy a panangipatungpal iti ETSP ken “Libreng Sakay,” kagiddan iti panagregget a maliklikan ti panag-overlap dagiti programa tapno masigurado ti agtultuloy a biahe dagiti pasahero, nangruna iti oras iti nangato a demand.
