Naikkat iti serbisio ti maysa a pulis kalpasan a napaneknekan iti kaso a grave misconduct seknan iti panangigemna iti kaso iti ipupusay iti “estranged wife” wenno asawana a ni Police SMSgt. Diane Marie Mollenido ken ti anakna a ni John Ysmael.
Sigun iti National Police Commission (NAPOLCOM), napaneknekan a responsibilidad ni Police SMSgt. John Mollenido iti grave misconduct, neglect of duty, ken conduct unbecoming of a police officer.
Nasarakan ti bangkay ni Diane Marie iti maysa a karayan idiay Pulilan, Bulacan idi Enero 24, bayat a nasarakan met ti anakna iti maysa a calamansi farm idiay Tarlac idi Enero 29. Rimmuar iti autopsy a napaltugan ti ina bayat a pimmusay ti ubing gapu iti asphyxia.
Kinuna iti NAPOLCOM a pinapartak iti pulis ti dagos a cremation dagiti bangkay uray saan pay a nalpas ti medico-legal procedures, a nangitunda iti pannakadadael iti napateg nga ebidensia. Panaglabsing daytoy iti Presidential Decree No. 1829 wenno obstruction of justice, kasta metten kadagiti pagalagadan iti NAPOLCOM ken Department of Health seknan iti panangigem kadagiti bangkay kadagiti kaso a maim-imbestigaran.
Sigun iti komision, nalawag a nilabsing iti pulis ti pagrebbenganna ken kasta metten ti linteg.
Kabayatanna, addan ti dua a naipila a kaso a murder kontra iti tallo a suspek seknan iti insidente, a mapapati a nagramut iti pannakapaay iti panangilako iti lugan idiay Quezon City. Naikkat met ti nagan ni Mollenido kas repondent kalpasan nga impaayan ti korte iti gundaway ti mosion para iti daytoy.
